- భద్రాద్రి కొత్తగూడెం జిల్లా జూలూరుపాడులో ఘటన
జూలూరుపాడు,వెలుగు: పూడ్చి పెట్టిన డెడ్ బాడీని వెలికి తీసి పోస్టుమార్టం చేసిన ఘటన భద్రాద్రి కొత్తగూడెం జిల్లాలో జరిగింది. జూలూరుపాడు సీఐ ఇంద్రసేనారెడ్డి తెలిపిన ప్రకారం.. జూలూరుపాడు ఎస్సీ కాలనీకి చెందిన కత్తి అరవింద్(26) గత నెల 7న నూడుల్స్తిని అస్వస్థతకు గురికాగా ఖమ్మంలోని ప్రైవేట్ ఆస్పత్రిలో చేర్పించారు. చికిత్స పొందుతూ అదే నెల16న చనిపోయాడు. డెడ్ బాడీని కుటుంబసభ్యులు ఇంటికి తీసుకెళ్లి పూడ్చిపెట్టారు.
తన కొడుకు మృతిపై అనుమానాలు ఉన్నాయని తండ్రి రాములు ఈనెల 4న స్థానిక పోలీస్ స్టేషన్లో కంప్లయింట్ చేశాడు. జూలూరుపాడు పోలీసులు మంగళవారం డెడ్ బాడీని వెలికితీశారు. తహసీల్దార్ స్వాతి బిందు సమక్షంలో కొత్తగూడెం ఫోరెన్సిక్ డాక్టర్ రమణమూర్తి పోస్టుమార్టం చేశారు. రిపోర్ట్ వచ్చాక తగు చర్యలు తీసుకుంటామని సీఐ ఇంద్రసేనారెడ్డి తెలిపారు.
